العطر ما يختفي، أنت اللي تعوّدت عليه. أغلب الشكاوى من الثبات سببها واحد من خمسة: جودة الزيت العطري، تركيز العطر، بشرتك، حرارة الجو، أو أنفك نفسه. وكل واحد منها له حل بسيط.
كل أسبوع تقريبًا يوصلنا السؤال نفسه بصيغ مختلفة: "رشّيت الصبح وعلى الظهر ما حسّيت بشي"، "العطر حلو بس ما يثبت"، "ليش نفس العطر يثبت على صاحبي وما يثبت عندي؟". والجواب في أغلب الحالات له علاقة بثلاثة أشياء: جودة العطر، وكيف يشتغل العطر أصلًا، وكيف يشتغل أنفك.
عندنا عميلان، كل واحد منهم صنّع عندنا تقريبًا ألف قارورة من نفس الرائحة. رائحة عطر عالمي معروف كان في فترة من الفترات ترند، والكل يطلبه. الاثنان جابوا الزيت العطري بنفسهم، من مصدرين مختلفين، ونفس الرائحة على الورق.
الفرق بين القارورتين كان كبيرًا: في الجودة، وفي الثبات، وفي عمق الرائحة. نفس التركيبة، نفس الكحول، نفس خط التعبئة. اللي اختلف هو الزيت. من يومها صرت أقول للعميل: قبل ما تسأل عن التركيز، اسأل من وين جاي الزيت.
العطر خليط من عشرات المواد العطرية، وكل مادة تتبخر بسرعة مختلفة. المواد الخفيفة، مثل الحمضيات والنعناع، تطير في أول ربع ساعة. هذي اللي نسميها الافتتاحية (top notes)، وهي اللي تشمها في المحل وتقول "واو". المواد الأثقل، مثل الورد والياسمين والتوابل، تظهر بعدها وتعيش ساعتين أو ثلاث، وهذي القلب. والمواد اللي ما تطير بسهولة، مثل العود والمسك والعنبر والفانيلا، تبقى على الجلد ساعات طويلة، وهذي القاعدة.
يعني العطر اللي شميته أول ثلاث دقايق ما راح تشمه بعد ساعة. مو لأنه راح، بل لأن الطبقة اللي أعجبتك كانت الافتتاحية، وهي بطبيعتها قصيرة العمر. العطر اللي "يثبت" هو عطر قاعدته ثقيلة، وغالبًا الافتتاحية تكون أهدى.
نفس الرائحة ممكن تجيك من عشرة مصادر، وكل مصدر بمستوى. الزيت الرخيص يعطيك الافتتاحية نفسها تقريبًا، لكن قاعدته ضعيفة، فيختفي بسرعة ويطلع "مسطّح" بلا عمق. والزيت الجيد يحمل المواد الثقيلة اللي تعيش ساعات. هذا السبب اللي ما يظهر في المحل، ويظهر في آخر اليوم.
نسبة الزيت العطري في القارورة تحدد كم يعيش. الكولونيا فيها تقريبًا 2 إلى 5٪ زيت، والأو دو تواليت 5 إلى 15٪، والأو دو بارفان 15 إلى 20٪، والبارفان أكثر. النسب تختلف من مصنع لآخر، لكن القاعدة ثابتة: زيت أكثر يعني ثبات أطول. إذا عطرك أو دو تواليت وتنتظر منه ثمان ساعات، المشكلة في التوقع مو في العطر.
البشرة الجافة ما تمسك العطر. الزيت العطري يحتاج شي يتعلّق فيه، والجلد الجاف يشرب العطر ويبخره بسرعة. البشرة الدهنية تمسكه أطول، وهذا سبب إن نفس العطر يثبت على شخص وما يثبت على ثاني. ترطيب بسيط بكريم بدون رائحة قبل الرش يفرّق كثير.
الحرارة تسرّع التبخر. في جدة والرياض صيفًا، العطر يفوح أقوى أول ساعة ثم يختفي أسرع من نفس العطر في الشتاء. عشان كذا العطور الحمضية الخفيفة تناسب الصيف، والعود والعنبر يناسبون الشتاء والمناسبات الداخلية.
هذا أهم سبب وأقلهم شهرة. أنفك مصمم يتجاهل الروائح الثابتة بعد دقائق، عشان يقدر ينتبه للروائح الجديدة. اسمه العلمي التكيّف الشمّي (olfactory adaptation). النتيجة: أنت تتوقف عن شم عطرك بعد نص ساعة، والناس حولك لا يزالون يشمونه. أكثر واحد يحكم على ثبات عطرك هو شخص غيرك.
وأنا أشوف إن أكثر الناس يرشون كثير عشان يحسون بالعطر، والنتيجة إن اللي حولهم يختنقون وهم ما يحسون بشي. رشتين إلى ثلاث من عطر تركيزه مناسب أفضل من ست رشات من عطر خفيف.
تجربة آمنة. إذا عندك حساسية جلدية جرّب على مساحة صغيرة أول.
هذا جزء من مرجع الواحة، نكتب من مصنعنا في جدة. إذا مهتم أكثر، تفضّل بزيارتنا.
تواصل معنا